काठमाडाैं । युरोपेली च्याम्पियन्स लिगको नयाँ ढाँचाअनुसार यस सिजनको लिग चरणका खेलहरूमा इङ्लिस प्रिमियर लिगका ६ टोलीले ऐतिहासिक प्रतिस्पर्धाहरूको सामना गर्ने भएका छन्।
पछिल्लो सिजनबाट सुरु भएको ३६ टोली सहभागी लिग प्रणालीमा यस वर्ष पहिलो पटक प्रिमियर लिगका ६ टोलीले एकैसाथ सहभागिता जनाएका छन्।
च्याम्पियन्स लिगको लिग चरणमा लिभरपुल र म्यानचेस्टर सिटी दुवैले १५ पटकको विजेता रियल म्याड्रिडसँग खेल्नेछन् भने टोटेनह्याम र न्युक्यासलले साबिक विजेता पेरिस सेन्ट-जर्मेन (पीएसजी)को सामना गर्नेछन्। यी इङ्लिस क्लबहरूले नकआउट चरणमा पुग्दासम्म एक-अर्काको सामना गर्न पाउने छैनन्।
लिभरपुलले रियल म्याड्रिडसँगै एट्लेटिको म्याड्रिड र गत सिजनको उपविजेता इन्टर मिलानसँग खेल्नेछ। पेप गार्डिओलाको म्यानचेस्टर सिटीले रियल म्याड्रिडका साथै नापोली र बोरुसिया डर्टमन्डसँग भिड्नेछ।
च्याम्पियन्स लिगमा फर्किएको न्युक्यासलले बार्सिलोनालाई सेन्ट जेम्स पार्कमा स्वागत गर्नेछ । युरोपा लिग जितेर च्याम्पियन्स लिगमा स्थान बनाएको टोटेनह्यामले पनि डर्टमन्ड र मोनाकोसँग खेल्नेछ।
यसपटक चेल्सीले बार्सिलोना र बायर्न म्युनिखसँग सामना गर्नेछ। त्यसैगरी, आर्सनलले ह्यारी केनको बायर्न म्युनिख र इन्टर मिलानसँग खेल्नेछ।
नयाँ ढाँचाअनुसार, हरेक टोलीले लिग चरणमा ८ खेल खेल्नेछन्। पहिलो खेल सेप्टेम्बर १६ मा हुनेछ भने लिग चरणका अन्तिम खेलहरू जनवरी २८, २०२६ मा सम्पन्न हुनेछन्।
