काठमाडौं । क्रिकेट एसोसिएसन अफ नेपाल (क्यान) ले आईसीसी टी–२० विश्वकप २०२६ को एशिया तथा ईस्ट एशिया प्यासिफिक छनोट फाइनलका लागि १५ सदस्यीय टोली घोषणा गरेको छ ।
यो टोली युवा ऊर्जा र अनुभवी खेलाडीहरूको सन्तुलित मिश्रण हो, यो टोलीले नेपाललाई २०२६ मा भारत र श्रीलंकामा आयोजना हुने टी–२० विश्वकपमा स्थान बनाउने सपना बोकेको छ । हालै युएईमा वेस्ट इन्डिजसँगको ऐतिहासिक सिरिज जितेको नेपाली टोली अब ओमानमा हुने छनोट प्रतियोगितामा उत्कृष्ट प्रदर्शन गर्ने लक्ष्यका साथ प्रस्थान गरेको छ ।
वेस्ट इन्डिजसँगको सिरिज खेल्न युएई गएको १६ सदस्यीय टोलीबाट साहब आलमलाई बाहिर राखेर १५ सदस्यीय टोली चयन गरिएको छ । साहब आलम ट्राभलिङ रिजर्भका रूपमा रहनेछन्, जसले आवश्यक परेको खण्डमा टोलीलाई सहयोग गर्नेछन् । यो परिवर्तनले टोलीको रणनीतिमा थप तीक्ष्णता ल्याउने अपेक्षा गरिएको छ ।
कप्तान रोहित कुमार पौडेलको नेतृत्वमा रहेको यो टोलीमा ओपनिङ ब्याट्सम्यान कुशल भुर्तेल र आसिफ शेख जस्ता आक्रामक खेलाडीहरू छन्, जसले विपक्षी बलरहरूलाई दबाब दिन सक्छन् । मध्यक्रममा दीपेन्द्र सिंह ऐरी, कुशल मल्ल र सन्दीप जोरा जस्ता अलराउन्डरहरूले टोलीलाई गति दिनेछन् । स्पिन तर्फ सन्दीप लामिछाने र ललित नारायण राजवंशीको उपस्थितिले नेपालको बलिङलाई थप मजबुत बनाएको छ ।
पेस आक्रमणमा करण केसी, सोमपाल कामी, गुलशन झा र नन्दन यादव जस्ता खेलाडीहरूले विविधता थपेका छन् । त्यसैगरी टोलीमा युवा खेलाडीहरू लोकेश बम र नन्दन यादवले नयाँ ऊर्जा थपेका छन् ।
१६ सदस्यीय टोलीको घोषणापछि सबैको ध्यान ओमान छनोटमा केन्द्रित भएपनि, हालै युएईको शारजाहमा भएको वेस्ट इन्डिजविरुद्धको तीन खेलको टी–२० सिरिजमा जित हात पार्नु नेपाल क्रिकेटको लागि माइलस्टोन रहेको थियो । नेपालले यो सिरिज २–१ ले जितेको थियो, जसमा दोस्रो खेलमा वेस्ट इन्डिजलाई मात्र ८३ रनमा समेटेर ९० रनको ठूलो अन्तरले जित हासिल गरेको थियो । यो जित दुई पटकको टी–२० विश्वकप विजेता राष्ट्र वेस्ट इन्डिजविरुद्धको थियो, जसले नेपाललाई अन्तर्राष्ट्रिय स्तरमा नयाँ पहिचान दिएको छ ।
आईसीसी टी–२० विश्वकप २०२६ को एशिया/ईस्ट एशिया प्यासिफिक छनोट फाइनलका खेल यहि असोज २२ देखि ३१ गतेसम्म ओमानमा हुँदैछ । नेपाल समूह चरणमा जापान र कुवेतसँग प्रतिस्पर्धा गर्नेछ । समूह चरणबाट उत्कृष्ट प्रदर्शन गरेर सुपर ६ मा प्रवेश गर्दै शीर्ष तीन टोली भित्र स्थान बनाउन सफल टोल िमात्र विश्वकपमा छनौट हुनेछ । यो छनोटमा नेपालसँगै अन्य एसोसिएट राष्ट्रहरू जस्तै ओमान, हङकङ, सिंगापुर, मलेसिया आदि सहभागी छन् ।
यदि ओमानमा नेपालले आफ्नो क्षमता अनुसार खेल्यो भने, सन् २०२६ मा हुने टी–२० विश्वकपमा नेपालको सहभागिता निश्चित हुनेछ । यो यात्रा नेपाली क्रिकेटलाई नयाँ उचाइमा पु¥याउने अवसर पनि हो, जसले लाखौं नेपाली हृदयहरूलाई एकताबद्ध गर्नेछ ।
