साविक विजेता अर्जेन्टिनाले आगामी वर्ष उत्तर अमेरिकामा आयोजना हुने फिफा विश्वकप २०२६ मा स्थान सुरक्षित गरेको छ।
दक्षिण अमेरिकी छनोटअन्तर्गत उरुग्वे र बोलिभियाबीचको खेल गोलरहित बराबरीमा सकिएपछि अर्जेन्टिनाले ब्राजिलसँग खेल्नु अघि नै विश्वकपको टिकट पक्का गर्यो।
दक्षिण अमेरिकी छनोटमा १० टिम सहभागी छन्, जसबाट शीर्ष ६ टिमहरू सिधै विश्वकपमा छनोट हुने व्यवस्था छ।
१३ खेलपछि अर्जेन्टिना २८ अंकसहित तालिकाको शीर्ष स्थानमा रहेको छ। दोस्रो स्थानको टोलीभन्दा अर्जेन्टिना ६ अंकले अघि छ।
गत संस्करणको विजेता समेत रहेको अर्जेन्टिना अमेरिका, मेक्सिको र क्यानाडामा हुने विश्वकप २०२६ का लागि छनोट हुने पहिलो दक्षिण अमेरिकी टिम बनेको छ।
हाल अर्जेन्टिना छनोट अन्तर्गत ब्राजिलसँग खेलिरहेको छ।
विश्वकपका तीन आयोजक राष्ट्रसहित हालसम्म ७ टोलीले विश्वकपमा स्थान सुरक्षित गरिसकेका छन्। एसियाबाट जापान र इरान तथा ओसियानाबाट न्युजिल्याण्ड छनोट भइसकेका छन्।
सन् २०२६ को फिफा विश्वकपमा ४८ टिमले प्रतिस्पर्धा गर्नेछन्।
