काठमाडौं । अन्तर्राष्ट्रिय क्रिकेट काउन्सिल (आईसीसी)ले अमेरिकी क्रिकेट बोर्डको सदस्यता तत्कालका लागि निलम्बन गरेको छ। आईसीसी बोर्डको बैठकले यो निर्णय गरेको हो।
एक वर्षको गहिरो अध्ययन र सरोकारवालाहरूसँगको छलफलपछि यो कदम चालिएको आईसीसीले जनाएको छ। सदस्यता निलम्बनको मुख्य कारण युएसए क्रिकेटले आईसीसीको नियम र दायित्वहरू बारम्बार उल्लंघन गर्नु हो।
यसमा प्रशासनिक संरचना सही ढंगले लागू गर्न नसक्नु, अमेरिकाको ओलम्पिक तथा पाराओलम्पिक कमिटीसँग राष्ट्रिय खेल निकायको मान्यता प्राप्त गर्नमा प्रगति नगर्नु र अमेरिका तथा विश्वभर क्रिकेटको प्रतिष्ठामा हानि पुग्ने खालका काम गर्नु लगायतका विषयहरू समावेश छन्।
आईसीसीले यो निर्णय खेलको दीर्घकालीन हितका लागि आवश्यक रहेको बताएको छ। यद्यपि, निलम्बनले खेलाडीहरूमा असर नपरोस् भन्ने कुरालाई प्राथमिकतामा राखिएको छ। यसकारण, अमेरिकाको राष्ट्रिय टोलीले आईसीसीका प्रतियोगिताहरू खेल्न पाउनेछन्, जसमा २०२८ को लस एन्जलस ओलम्पिकको तयारी पनि पर्छ।
अब राष्ट्रिय टोलीको व्यवस्थापन र प्रशासनको काम अस्थायी रूपमा आईसीसी वा यसले तोकेका प्रतिनिधिहरूले हेर्नेछन्। यसले खेलाडीहरूलाई निरन्तर सहयोग सुनिश्चित गर्ने र ओलम्पिकमा क्रिकेट समावेश गर्ने लक्ष्यमा कायम राख्नेछ।
आईसीसीले एक सामान्यीकरण समिति पनि गठन गर्नेछ, जसले युएसए क्रिकेटको निलम्बन फुकुवा गर्नका लागि आवश्यक कदमहरूबारे जानकारी गराउनेछ। यसमा युएसए क्रिकेटको प्रशासनिक संरचना र कार्यप्रणालीमा स्पष्ट परिवर्तन हुनुपर्नेछ। यो समितिले युएसए क्रिकेटको प्रगतिको निगरानी पनि गर्नेछ र आवश्यक सहयोग प्रदान गर्नेछ।
गत वर्षको आईसीसीको वार्षिक साधारण सभामा पनि युएसए क्रिकेटलाई नियम पालना नगरेको भन्दै ‘अन नोटिस’ मा राखिएको थियो। तैपनि, यसले आफ्नो प्रतिबद्धता पूरा गर्न नसकेपछि निलम्बनको निर्णय गरिएको हो।
