काठमाडाैं । भारतले बंगलादेशलाई ४१ रनले पराजित गर्दै एसिया कप २०२५ को फाइनलमा स्थान पक्का गरेको छ । दुबईमा भएको सुपर फोरको यस खेलमा भारतले शानदार प्रदर्शन गर्दै जित दर्ता गरेको हो।
टस जितेर पहिले ब्याटिङ गरेको भारतले निर्धारित २० ओभरमा ६ विकेट गुमाएर १६८ रनको सम्मानजनक योगफल तयार गर्यो। भारतको लागि ओपनर अभिषेक शर्माले उत्कृष्ट प्रदर्शन गर्दै ३७ बलमा ७५ रनको आक्रामक अर्धशतकीय पारी खेले। उनको पारीमा ६ चौका र ५ छक्का समावेश थियो।
हार्दिक पाण्ड्याले ३८ रन तथा शुभमन गिलले पनि २९ रनको योगदान दिएर भारतलाई बलियो सुरुवात दिलाएका थिए ।
१६९ रनको विजयी लक्ष्य पछ्याएको बंगलादेशको सुरुवात खराब रह्यो। उनीहरूले नियमित अन्तरालमा विकेट गुमाए। बंगलादेशका लागि सैफ हसनले ५१ बलमा ६९ रनको संघर्षपूर्ण अर्धशतक बनाए पनि त्यो जितका लागि पर्याप्त भएन।
भारतको जितमा बलरहरूको महत्त्वपूर्ण भूमिका रह्यो। भारतका लागि बायाँ हाते स्पिनर कुलदीप यादवले उत्कृष्ट बलिङ गर्दै ३ विकेट लिए। यस्तै, वरुण चक्रवर्ती र जसप्रीत बुमराहले समान २-२ विकेट लिएर बंगलादेशलाई १२७ रनमा समेट्न मद्दत गरे।
यो जितसँगै भारत एसिया कपको फाइनलमा पुगेको छ। अब फाइनलको अर्को स्थानका लागि बंगलादेश र पाकिस्तान बीचको खेल महत्वपूर्ण भएको छ। यस खेलको विजेताले फाइनलमा भारतसँग खेल्नेछ। श्रीलंका भने फाइनलको दौडबाट बाहिरिएको छ ।
